சென்னை: 'அறிக்கை அரசியலை கைவிட்டு, எதிர்க்கட்சி தலைவர் உதயநிதியை களத்துக்கு வர சொல்லுங்கள். இல்லையென்றால் தி.மு.க.,வை வளர்க்க முடியாது,' என, தி.மு.க., தலைவர் ஸ்டாலினிடம், அக்கட்சி மூத்த நிர்வாகிகள் கூறியதாக, தகவல் வெளியாகி உள்ளது.

சட்டசபை தேர்தலில், சென்னை கொளத்துார் தொகுதியில், ஸ்டாலின் தோல்வி அடைந்தார். உடல்நிலை காரணமாக, கட்சி சீரமைப்பு பணிக்காக, ஊர் ஊராக, அவரால் செல்ல முடியவில்லை. அந்த பணிகளை, உதயநிதி கவனிக்காமல், வீட்டிலேயே இருக்கிறார்.

மதுராந்தகம், தாராபுரம் இடைத்தேர்தலில், வெற்றி வாய்ப்பு இருந்தபோதிலும், முதல்வர் விஜய் தெருத்தெருவாக சென்று ஓட்டு கேட்டார். ஆனால், உதயநிதியோ காரை விட்டு இறங்காமல் பிரசாரம் செய்தார்.

கடந்த 3ம் தேதி, இடைத்தேர்தல் பிரசாரத்தை முடித்து, வீட்டுக்குள் சென்றவர், வெளியே வரவில்லை. இது கட்சி மூத்த நிர்வாகிகளிடம், அதிருப்தியை ஏற்படுத்தி உள்ளது. அவரை களத்திற்கு அனுப்புமாறு ஸ்டாலினிடம் வலிறுத்தி உள்ளனர்.




தி.மு.க., முன்னாள் அமைச்சர்கள் சிலர் கூறியதாவது: மின்கட்டணம், விலைவாசி உயர்வு, சட்டம் ஒழுங்கு என ஏராளமான பிரச்னைகள் உள்ளன. இதற்கு, உதயநிதியிடம் இமிருந்து கேலி, கிண்டலுடன் அறிக்கைகள் மட்டும் வருகின்றன; களத்தில் இறங்க மறுக்கிறார். ஆளுங்கட்சிக்கு எதிராக வெறும் குற்றச்சாட்டை கூறினால் போதுமா; பிரச்னைகளுக்கு எதிராக போராடவிட்டால், மக்கள் எப்படி நம்புவர்.

இது குறித்து கேட்டால், 'விஜய், வீதிக்கு வந்தா ஜெயிச்சாரு. வீட்டில் இருந்து தானே அரசியல் செஞ்சாரு' என, தன்னை விஜயுடன் ஒப்பிடுகிறார். தி.மு.க.,வினர் வீட்டு நிகழ்ச்சிகளுக்கு சென்றதை எல்லாம் சுட்டிக்காட்டுவதோடு, 'சட்டசபையில் என்னமா பேசினார் பாத்திங்கல்ல' என உதயநிதியுடன் இருப்போர் கூறுகின்றனர்.

தன்னை போலவே, இளைஞர் அணியையும் உதயநிதி வைத்திருக்கிறார். வெறுமென அறிக்கை, 'எடிட்' செய்யப்பட்ட வீடியோக்களை, சமூக வலைதளங்களில், 'ஷேர்' செய்தால், இளைஞர்களை கவர்ந்து விடலாம் என, தப்புக்கணக்கு போடுகிறார்.

உதயநிதியின் நடவடிக்கை, ஸ்டாலினுக்கும் பிடிக்கவில்லை. உதயநிதி இப்படியே இருந்தால், கட்சியை வளர்க்க முடியாது என, மூத்த நிர்வாகிகளான, முன்னாள் அமைச்சர்கள் சிலர், ஸ்டாலினிடம் நேரடியாக ஆதங்கப்பட்டுள்ளனர். இவ்வாறு அவர்கள் கூறினர்.