மாட்ரிட்: ஸ்பெயினில் நடந்த ரயில் விபத்தில் 68 பேர் பலியானதற்கு பொறுப்பேற்று போக்குவரத்து அமைச்சர் பதவியை ராஜினாமா செய்ய வலியுறுத்தி மக்கள் பெரும் போராட்டத்தில் ஈடுபட்டனர்.

ஐரோப்பிய நாடான ஸ்பெயினில் இரண்டு பயணியர் ரயில்கள் மோதி விபத்துக்குள்ளானதில், 68 பேர் உயிரிழந்தனர்; 200க்கும் மேற்பட்டோர் காயமடைந்தனர். ஸ்பெயினில் இந்த ஆண்டில் நடக்கும் இரண்டாவது பெரிய ரயில் விபத்து இதுவாகும்.

இந்த விபத்துக்கு பொறுப்பேற்று, போக்குவரத்துத் துறை அமைச்சர் ஆஸ்கர் புயென்டே ராஜினாமா செய்யக் கோரி, அவரது அலுவலகம் முன், ஆயிரக்கணக்கானோர் போராட்டத்தில் ஈடுபட்டனர்.

அமைச்சருக்கு எதிராகக் கண்டன முழக்கங்களை எழுப்பிய போராட்டக்காரர்கள், அவரை மரணத்தின் அமைச்சர் என்று விமர்சித்தனர். அப்போது அவர்களை போலீசார் கலைக்க முயன்றனர். இதனால் இரு தரப்புக்கும் இடையே தள்ளுமுள்ளு ஏற்பட்டு, அது மோதலாக மாறியது. இதனால் அப்பகுதியில் பெரும் பரபரப்பு நிலவியது.

செவில்லே நகரில் உள்ள பாத்ரே பியோ பல்மேட் ரயில் நிலையம் அருகே சரக்கு ரயில் ஒன்று தடம் புரண்டது. இந்தச் சம்பவத்தில் அதிர்ஷ்டவசமாக யாருக்கும் காயம் ஏற்படவில்லை.