புதுச்சேரி: தட்டஞ்சாவடி தொகுதியில் மின்சார கட்டமைப்பை மேம்படுத்த அசோக் ஆனந்தன் எம்.எல்.ஏ., தலைமையில் ஆலோசனை கூட்டம் நடந்தது.

புதுச்சேரி மின்துறை கண்காணிப்பு பொறியாளர் அலுவலகத்தில் நடந்த கூட்டத்தில், மின்துறையின் கண்காணிப்புப் பொறியாளர், மின்துறைத் தலைவர் களியமுதன் மற்றும் அதிகாரிகள் கலந்து கொண்டனர்.

தட்டாஞ்சாவடி தொகுதியில் பல்வேறு பகுதிகளில் மின் கம்பங்களின் நிலை குறித்து ஆலோசிக்கப்பட்டது. சேதமடைந்த மின் கம்பங்களைக் கண்டறிந்து, அவற்றைச் சீரமைப்பது, புதிய மின் கம்பங்கள் அமைப்பது, குறித்து விவாதிக்கப்பட்டது.

தொகுதியில் மின்சார தேவையை கருத்தில் கொண்டு, மின்சார வினியோகத்தை மேம்படுத்துவது, தேவையான இடங்களில் உயர் அழுத்த மின் மாற்றிகள் அமைப்பது, மின்சார வினியோகத்தில், ஏற்படும் தடைகள், மின் மாற்றிகளில் ஏற்படும் பழுதுகள் மற்றும் உள்கட்டமைப்பு வசதிகளை மேம்படுத்துவது குறித்தும் ஆலோசிக்கப்பட்டது.