புதுடில்லி: 'இண்டி' கூட்டணி பொதுக்கூட்டத்தால், தீபாவளி பண்டிகை கால வியாபாரம் கடுமையாக பாதிக்கப்பட்டதாக டில்லி வர்த்தகர்கள் கூட்டமைப்பு கவலை தெரிவித்துள்ளது.

தலைமை தேர்தல் கமிஷனர் ஞானேஷ் குமார் பதவி விலகக் கோரி, டில்லி ராம் லீலா மைதானத்தில், 'இண்டி' கூட்டணி சார்பில் மாபெரும் பொதுக்கூட்டம் நேற்று நடந்தது. முன்னதாக, டில்லியின் கன்னாட் பிளேஸில் உள்ள மின்டோ சாலையில் இருந்து ராம் லீலா மைதானம் வரை, 'இண்டி' கூட்டணி தலைவர்கள் திறந்தவெளி வாகனத்தில் சென்றனர். இதில், ராகுல், காங்., - எம்.பி., பிரியங்கா, சமாஜ்வாதி தலைவர் அகிலேஷ் யாதவ், திரிணமுல் காங்., தலைவர் மம்தா பானர்ஜி உள்ளிட்டோர் பங்கேற்றனர்.

இந்நிலையில், டில்லி வர்த்தகர்கள் கூட்டமைப்பின் தலைவர் பிரிஜேஷ் கோயல் கூறியதாவது: பண்டிகை காலத்தில் எங்கள் வாழ்வாதாரத்தை பாதுகாக்கவே பேரணியை ஒத்திவைக்க கோரினோம். எங்களை பா.ஜ.,வின் முகவர்கள் எனக் கூறுவது தவறானது. மத்திய மற்றும் பழைய டில்லி பகுதியில் உள்ள, 20 முக்கிய சந்தைகளில் தினமும், 12 ஆயிரம் கோடி ரூபாய் வரை வர்த்தகம் நடக்கும்.

இந்த பேரணியால், 80 சதவீத வர்த்தகம் பாதிக்கப்பட்டது. உள்ளூர் வியாபாரிகளை ஆதரிக்கும்படி ராகுல் பேசுகிறார். ஆனால், 2.5 லட்சம் கடைகள் அடைக்கப்பட்டு, சாலைகள் மறிக்கப்பட்ட பின், பேரணிக்கு வரும் மக்கள் எங்கு சென்று பொருட்களை வாங்குவர். இவ்வாறு அவர் கூறினார்.

@block_B@

'இண்டி' பொதுக்கூட்டம் குறித்து, மத்திய உள்துறை அமைச்சர் அமித் ஷா நேற்று கூறியதாவது: டில்லியில் 1984 நவ., 1ல் அப்பாவி சீக்கியர்கள் படுகொலை செய்யப்பட்டனர். பலர் உயிருடன் எரிக்கப்பட்டனர். இனப்படுகொலை நடந்த இதே நாளில், 'இண்டி' கூட்டணியினர் கொண்டாட்ட பேரணி நடத்தியுள்ளனர். சீக்கிய கலவரத்தால் பாதிக்கப்பட்ட மக்களின் மனதை மேலும் புண்படுத்தும் வகையில், இந்த போராட்டத்தை ராகுல் நடத்தி இருக்கிறார்.

சீக்கிய கலவரம் நடந்தபோது, அப்போதைய பிரதமரும், காங்., தலைவருமான ராஜிவ் பேசியதை என்னால் மறக்கவே முடியாது. 'ஒரு பெரிய மரம் சாயும்போது, பூமி அதிரத்தான் செய்யும்' என ஆயிரக்கணக்கான சீக்கியர்கள் கொல்லப்பட்டதை அவர் நியாயப்படுத்தி பேசினார். இப்படி இரக்கமற்ற கருத்துகளை காங்., தலைவர்களால் மட்டுமே கூற முடியும். இவ்வாறு அவர் கூறினார்.block_B

@block_Y@

'இண்டி' கூட்டணி பொதுக்கூட்டம் நடத்திய அதே வேளையில், பா.ஜ., சார்பில் மேற்கு டில்லியின் ஹரி நகரில் எதிர்ப்பு பேரணி நடத்தப்பட்டது. மத்திய அமைச்சர் ஹர்தீப் சிங் புரி தலைமையில நடந்த இந்த பேரணியில், 1984ல் சீக்கியர்களுக்கு எதிராக நடந்த கலவரத்திற்கு காங்கிரஸ், அக்கட்சியின் மூத்த தலைவர் ராகுல் உள்ளிட்டோர் மன்னிப்பு கோர வேண்டும் என, வலியுறுத்தப்பட்டது.block_Y