மப்பேடு: கொருக்கம்பேடு பகுதியில், முகமூடி அணிந்த நபர்கள், பூட்டிய வீடுகளில் புகுந்து, வெள்ளி விளக்குகளை திருடி சென்றனர்.

கடம்பத்துார் ஒன்றியம், கூவம் ஊராட்சிக்குட்பட்ட கொருக்கம்பேடு கிராமத்தை சேர்ந்தவர் முருகானந்தம், 75. உடற்கல்வி ஆசிரியர்.

இவர், தன் மனைவி கன்னியம்மாள், 70, உடன், சென்னையில் உள்ள மகள் வீட்டில் வசித்து வருகிறார். கோவில் திருவிழா மற்றும் கிராம பகுதிகளில் நடைபெறும் விழாவிற்கு மட்டும், கொருக்கம்பேடு வந்து செல்வார்.

இந்நிலையில், நேற்று அதிகாலை இவரது கொருக்கம்பேடு வீட்டின் பூட்டை உடைத்து உள்ளே புகுந்த முகமூடி அணிந்த நபர்கள், இரு வெண்கல விளக்கு, வெள்ளி விளக்கு ஆகியவற்றை திருடி சென்றனர்.

இதுகுறித்து கன்னியம்மாள் கொடுத்த புகாரின்படி, மப்பேடு போலீசார் வழக்கு பதிந்து விசாரித்து வருகின்றனர்.